આ દિવસોમાં બોલિવૂડમાં ઘણા સ્ટાર કપલના લગ્નના સમાચાર સામે આવી રહ્યા છે. તેમાંથી એક છે કેટરિના કૈફ અને વિકી કૌશલ. છેલ્લા ઘણા દિવસોથી એવી ચર્ચા ચાલી રહી છે કે બંને જલ્દી લગ્ન કરવા જઈ રહ્યા છે. તેવામાં તેમના લગ્ન સ્થળના સમાચાર પણ સામે આવી રહ્યા છે.
બંનેએ ડેસ્ટિનેશન વેડિંગની રોટ પસંદ કરી છે.
અભિનેત્રી પ્રિયંકા ચોપરાની જેમ તેઓ પણ રાજસ્થાનમાં સાત ફેરા લેશે. તમને જણાવી દઈએ કે કેટરિના અને વિકી સવાઈ માધોપુર જિલ્લાના બરવાડામાં ૭૦૦ વર્ષ જૂના કિલ્લા સિક્સ સેન્સ ફોર્ટમાં લગ્ન કરવા જઈ રહ્યા છે. આ કિલ્લો ખૂબ જ ભવ્ય છે. તેની સુંદરતા અને ચમક જોવા જેવી છે. તે જેટલો વૈભવી છે, તેટલી જ તગડી ફી અહીં રહેવા અને ખાવાની છે.
અમે તમને આ કિલ્લા વિશે બધું જ જણાવીએ તો રાજસ્થાનની સિક્સ સેન્સ હોટેલ સવાઈ માધોપુર જિલ્લાના મુખ્ય મથકથી લગભગ ૨૫ કિમી દૂર બરવાડાની ટેકરી પર આવેલી છે. આ લક્ઝુરિયસ હોટેલ કિલ્લાની અંદર બનાવવામાં આવી છે. તે પહેલા બરવાડાના સરપંચ ભગવતી સિંહ પાસે હતો. ભગવતી સિંહે બાદમાં આ કિલ્લો ઓસ્મોસ કંપનીને વેચી દીધો હતો.
તેને ખરીદ્યા બાદ કંપનીએ એક કિલ્લાને લક્ઝુરિયસ હોટલમાં બદલી નાખ્યો. આ હોટેલ આ ગ્રુપ દ્વારા સિક્સ સેન્સ ગ્રુપને લીઝ પર આપવામાં આવી છે. તેની સુંદરતા વિશે વાત કરીએ તો સિક્સ સેન્સ ફોર્ટ બરવાડા રિસોર્ટ ખૂબ જ સુંદર છે. તેમાં રાજસ્થાની રંગ સ્પષ્ટ દેખાય છે. આ કિલ્લો 14 મી સદીમાં બનાવવામાં આવ્યો હતો.
આ સિક્સ સેન્સ રિસોર્ટની ડિઝાઇન 700 વર્ષ પહેલાંના જૂના યુગના શાહી વાતાવરણને પ્રતિબિંબિત કરે છે. 700 વર્ષ જૂના આ કિલ્લાની ભવ્યતા ખૂબ જ અદભૂત છે. અંદરથી આ કિલ્લો રાજસ્થાનના રાજા-મહારાજાઓના ઠાઠમાઠની યાદ અપાવે છે. આ કિલ્લો દેખાવમાં એટલો આકર્ષક છે કે તેને જોઈને દરેકનું દિલ તેના પર આવી જાય તેવું છે. આ કિલ્લાનું આગણું પણ ઘણું મોટું અને ભવ્ય છે.
અંદર ઘણા મંદિરો અને જૂની વિરાસત પણ છે. આ કિલ્લામાં ભારતની પ્રથમ સિક્સ સેન્સ એટલે કે ઈન્ટરકોન્ટિનેન્ટલ હોટેલ્સ ગ્રૂપ (IHG) પણ છે, જે સુખાકારી અને ટકાઉપણાની લક્ઝરી બ્રાન્ડ હોટેલ છે. તમને જાણીને નવાઈ લાગશે કે 30 હજાર વર્ગ ફૂટમાં ફેલાયેલા આ કિલ્લાની અંદર એક રોયલ સ્પા અને ફિટનેસ સેન્ટર પણ છે.
આ કિલ્લો ચોક્કસપણે ભવ્ય હોટલમાં ફેરવાઈ ગયો છે, પરંતુ તેની સુંદરતા આજે પણ તેમની તેમ જ છે. રિસોર્ટની અંદર કે જ્યાં ઘણી બધી સુવિધાઓની ભરમાર છે, તો અહીંથી તળાવનો સુંદર નજારો પણ જોવા મળે છે. આ હોટેલ રણથંભોર નેશનલ પાર્કની એકદમ નજીક આવેલી છે. અહીંથી ગાર્ડનનો નજારો પણ સ્પષ્ટ દેખાય છે.
જો આ હોટલના ભાડાની વાત કરીએ તો તેમાં એક રાત્રિ રોકાણનું બુકિંગ 77,000 રૂપિયા છે અને જો તેમાં ટેક્સ ઉમેરવામાં આવે તો આ ખર્ચ તમારો 90,000 સુધી પહોંચી જાય અને આ ખર્ચ પણ સામાન્ય રૂમ માટે જ છે. સ્પેશિયલ રૂમની વાત કરીએ તો ત્યાં એક રાત રોકાવા માટેનું બુકિંગ 4 લાખ 94 હજાર રૂપિયા હોય છે. એમાં પણ ટેક્સ ઉમેર્યા પછી આ ખર્ચ પાંચ લાખ રૂપિયા થઈ જાય છે.
આ રિસોર્ટના દરેક સ્યુટનું અલગ નામ છે. તેમાં અભયારણ્ય સ્યુટ, ફોર્ટ સ્યુટ, અરવલ્લી સ્યુટ, રાની પ્રિન્સેસ સ્યુટ અને રાજા માન સિંહ સ્યુટ છે. અભયારણ્ય સ્યુટનું ભાડું સૌથી ઓછું છે જ્યારે રાજા માન સિંહ સ્યુટનું ભાડું સૌથી વધુ છે.